Nesten ein halv million såg Noreg ryke ut av fotball-EM

På det meste sat 478.000 sjåarar klistra til tv-skjermen og fekk med seg EM-forliset til dei norske fotballkvinnene i 0-1-tapet for Austerrike.

Det var fleire sjåarar enn TV 2 hadde då Noreg slo Nord-Irland 4-1 i opningskampen. Då var det i snitt 358.000 som følgde med, medan Austerrike-kampen snitta på 428.000 sjåarar, skriv Kampanje.

Noreg var nøydd til å slå Austerrike for å ta seg vidare, men måtte heller sjå Nicole Billa heade inn sigersmålet som gav austerriksk avansement.

TV 2 fortel at dei hadde ein marknadsdel på 57,7 prosent.

Sjåarrekorden i EM i år sett med norske auge vart sett i det fryktelege 0-8-tapet for England. Då hadde NRK1 nærare 600.000 sjåarar på det meste.

(©NPK)

Det gjekk ikkje vegen for dei norske fotballkvinnene i EM. Foto: Terje Pedersen / NTB

ANNONSE
Annonse