NGO: – Katastrofal situasjon for politiske fangar i Belarus
Ei menneskerettsgruppe basert i Tyskland beskriv situasjonen for politiske fangar i Belarus som «katastrofal».
I ei fråsegn fredag krev gruppa at uavhengige legar får tilgang til Maria Kolesnikova, ein av Belarus' mest kjende aktivistar. I september 2021 vart ho dømd til elleve års fengsel. Denne veka kom meldinga om at ho er alvorleg sjuk og innlagt på sjukehus.
Ifølgje Internationale Gesellschaft für Menschenrechte (IGFM) er det no rundt 1.400 politiske fangar i Belarus. Organisasjonen rettar ein appell til det tyske utanriksdepartementet der dei ber om støtte til kravet sitt om å få tilgang til Kolesnikova. I tillegg ber dei om at far og advokaten hennar får besøkje henne.
Kolesnikova var blant frontfigurane under massedemonstrasjonane mot regimet til Aleksandr Lukasjenko etter det omdiskuterte presidentvalet i 2020.
(©NPK)
Maria Kolesnikova, ein av fleire fengsla opposisjonsleiarar i Belarus, fotografert under ein demonstrasjon i Minsk i august 2020. Arkivfoto: Tut. By via AP / NTB
