Nice-terroristen hadde bilete av lærardrapsmannen
Mannen som drap tre personar då han gjekk til angrep på ei kyrkje i Nice, hadde eit bilete på mobilen sin av mannen som skar hovudet av ein lærar i Paris.
Angrepet mot Notre-Dame-kyrkja i Nice i slutten av oktober, skjedde berre to veker etter at historielæraren Samuel Paty fekk hovudet skore av i eit terrordrap etter at han hadde vist Muhammed-karikaturar i undervisninga.
18-åringen Abdullakh Anzorov vart skoten og drepen av politiet kort tid etter at han hadde drepe Paty. Mannen som stod bak angrepet i Nice, 21-åringen Brahim Aouissaoui, hadde eit bilete av Anzorov på mobiltelefonen sin, opplyser fransk terrorpoliti.
Det vart òg funne fleire IS-bilete på telefonen hans, og dessutan eit lydopptak der han kallar Frankrike eit land av vantru. Aouissaoui vart skoten etter knivangrepet, og ligg framleis på sjukehus med kritiske skadar.
(©NPK)
Politibetjentar står vakt ved Sacre Coeur i Paris dagen etter terrorangrepet i Nice. Foto: Thibault Camus/AP/NTB
