Nødetatane ber folk om ikkje å ringe nødnummera
I forkant av ekstremvêret Knud ber politiet og brannvesenet på Austlandet publikum om ikkje å belaste nødnummera med mindre det akutt fare for liv eller helse.
Mens vêrmeldingane fredag ettermiddag varsla om at stormen Knud kom stadig nærmare Austlandet, bad brannvesenets 110-sentral i Oslo, Vestviken og Telemark folk om ikkje å misbruke nødnummera.
- Vi forventar ekstremvêr og mange hendingar utover dagen. Nødnummer 110 skal berre brukast i akutte situasjonar, der det er fare for liv, helse eller alvorleg materiell skade, skriv 110-sentralen for Oslo på Twitter.
Dei ber folk heller ringe alternative nummer dersom dei må melde mindre alvorlege hendingar, nedblåste tre, vatn i kjellarar, og andre ting.
Politiet sluttar seg til oppfordringa og ber folk ringe 02800 dersom det dreier seg om mindre alvorlege hendingar. I Aust politidistrikt skal stormen først slå inn for fullt ut på kvelden, men allereie tidleg på ettermiddagen varsla operasjonssentralen om mange tre som har falle over ende.
Kollegaene i Vestviken 110 ber folk om sikre lause gjenstandar og sjekke stikkrenner og nedløp.
- Ikkje beveg deg på svaberg for å følgje med på bølgjer og sjøen, ver aktsam, skriv etaten.
(©NPK)
Ekstremvêret Knud er på veg. Fleire tre har velta ved Caledonien hotell i Kristiansand. Foto: Tor Erik Schrøder / NTB scanpix
