Noreg kan likevel få OL-plass i ishockey – Kina risikerer utkasting

Det avslører den nyvalde presidenten i Det internasjonale ishockeyforbundet (IIHF), Luc Tardif, overfor nyheitsbyrået AFP. Tardif seier at det blir avgjort i oktober.

– Dette spørsmålet melder seg heilt klart for herrelaget, men ikkje for kvinnene. Det skal spelast kampar med det kinesiske laget som skal følgjast av ein IIHF-representant, og så vil ei avgjerd bli teken, seier Tardif.

Sidan Noreg er det øvst rangerte laget som ikkje kvalifiserte seg til OL, vil nordmennene få OL-plassen og gå inn i gruppe med Canada, Tyskland og USA dersom Kina blir fjerna frå turneringa.

Norsk moglegheit

– Det stemmer. Vi er øvst på rankinga av dei laga som ikkje er med i utgangspunktet. Vi vart orienterte om dette på IIHF-kongressen i St. Petersburg i helga, seier ishockeypresident Tage Pettersen til NTB.

Han vil ikkje spekulere i kor sannsynleg det er at Kina blir kasta ut av OL, men seier at Norges Ishockeyforbund må førebu seg på at det kan skje.

– Vi som forbund må ta kontakt med IIHF for å få ei avklaring så raskt som mogleg. Det er ikkje lenge til OL, seier Pettersen.

Noreg tapte mot Danmark i den avgjerande OL-kvalifiseringskampen på Jordal Amfi i slutten av august. Danskane har hamna i OL-gruppe med Sveits, Tsjekkia og Russlands olympiske komité i Beijing.

Svakt

Kina er i utgangspunktet kvalifisert for OL-hockey som vertsnasjon, men er berre rangert som nummer 32 i verda av IIHF. Tardif er bekymra for nivået til det kinesiske laget, som ikkje har spelt ein kamp sidan 2019.

– Å sjå eit lag bli slått 15–0 er ikkje bra for nokon. Ikkje for Kina, og ikkje for ishockeyen.

– Om det ikkje blir mogleg med Kina, treng vi ein plan B, og rankinga seier at det er Noreg, legg Tardif til.

(©NPK)

Mats Zuccarello og dei andre norske iskrigarane kan likevel hamne i Beijing-OL.
Foto: Beate Oma Dahle / NTB