Norsk industri fyrer framleis for kråkene
Skyhøge straumprisar til trass – industrien slepper framleis ut store mengder overskotsvarme. Energien kjem likevel ikkje berre frå straum.
Sintef Energi har rekna ut at energisektoren slepper ut heile 20 terawattimar (TWh) energi, noko som svarer til 10 prosent av den totale energibruken vår, skriv Teknisk Ukeblad.
Sintef Energi understrekar at det viktigaste grepet for å løyse energikrisa er å redusere forbruket.
– Dei kilowattimane du ikkje treng å produsere, er dei viktigaste. Det må gå parallelt med å produsere meir fornybar energi, seier sjefsforskar Petter Nekså ved Sintef Energi.
Straumproduksjonen i eit normalår svingar rundt 155 TWh, medan forbruket ligg omkring 135–140 TWh. Av dette bruker industrien noko over 40 prosent. Biletet endrar seg om vi ser på total energibruk. Den ligg mykje høgare – 236 TWh i 2020. Då er industridelen auka til meir enn 70 prosent.
Sintef peikar på at denne overskotsvarmen rett og slett går ut i lufta.
– Anten du produserer pizza eller aluminium så endar opp mot halvparten som tapsvarme. Dette er overskotsenergi som kan utnyttast til oppvarming eller til og med kjøling. Det er ofte lettare å utnytte overskotsvarmen enn å få til ei forbetring av industriprosessane. Det siste er dyrt, og ofte også knytt til bedriftsløyndommar, seier Nekså.
(©NPK)
Industrien slepper framleis ut mykje overskotsvarme. Her frå Herøya industripark i Telemark.
Foto: Ole Berg-Rusten / NTB / NPK
