Ny elferje til 80 millionar kan ikkje brukast
Porsgrunn kommune får kritikk for å ha kjøpt inn ei ny elferje til 80 millionar kroner utan å ha oppgradert ferjeleiet slik at det kan ta ferja imot.
«Oppgradering av landfast infrastruktur burde ha vore betre greia ut før avgjerda om å kjøpe ny ferje blei tatt. Då ville fylkesting og bystyre ha hatt eit betre grunnlag for å vurdere dei samla økonomiske konsekvensane av å investere i ny ferje», heiter det i ein rapport frå Vestfold og Revisjon om ferjekjøpet ifølgje NRK.
Ferja vart kjøpt inn for å gi eit betre ferjetilbod mellom øyane i Porsgrunn-skjergarden. Vedtaket vart fatta i 2019, ferja var på plass i juni i år, men den har aldri forlate kaien på fastlandet i Bamble kommune.
Styret i selskapet, kommunen og fylkeskommunen har ikkje snakka med kvarandre og har skulda på kvarandre, meiner leiar av kontrollutvalet i Vestfold og Telemark fylkeskommune, Petter Berg.
– Kor mykje ei hamn kostar å få på plass, skulle vore avklart for lengst. Eg har sjeldan sett ein så kritisk rapport, seier Berg til NRK.
Rådmann Rose-Marie Christiansen i Porsgrunn kommune seier saka er pinleg.
– Det er mykje vi kan ta sjølvkritikk på i denne saka. Det har vore for dårleg kommunikasjon mellom ferjeselskapet og Porsgrunn kommune. Det seier jo òg kontrollutvalet, seier ho.
(©NPK)