Ødegaard om leiarrolla i Arsenal: – Kjenner meg meir sjølvsikker på banen
Martin Ødegaard har raskt vorte ein leiarskikkelse i Arsenals unge spelartropp. Nordmannen seglar opp som ein klar kandidat til å bli ny klubbkaptein.
Ødegaard bar kapteinsbindet i Arsenals 2-0-siger over Everton i ein treningskamp i helga, men han har enno ikkje vorte stadfesta som kaptein kommande sesong. Det venta å skje innan kort tid.
Til BBC fortel Ødegaard at han trivst med leiaransvaret i Arsenal.
– Eg kjenner meg meir sjølvsikker og rolegare på banen, så eg prøver å bruke det på ein god måte og gjere det beste for laget. Eg trur alle her er forventa å ta ei leiarrolle sjølv om ein er ung, seier Ødegaard til BBC.
Han har sidan mars i fjor vore kaptein på det norske landslaget.
23-åringen var også kaptein for Arsenal i fleire kampar mot slutten av sist sesong. Dei to seinaste kapteinane i Arsenal, Pierre-Emerick Aubameyang og Alexandre Lacazette, har forlate klubben sidan årsskiftet.
Arsenal-trenar Mikel Arteta stadfesta til TV 2 i april at Ødegaard er aktuell som ny kaptein. Drammensaren vart permanent klar for Arsenal frå Real Madrid i fjor sommar etter eit halvår på lån i London-klubben.
(©NPK)
Martin Ødegaard kan fort bli Arsenals nye kaptein. Foto: Javad Parsa / NTB
