Oljeprisen er over 80 dollar fatet – høgaste på nesten tre år
Nordsjøolje blir tysdag morgon omsett for 80,20 dollar per fat. Det er første gong på nesten tre år at prisen er over 80 dollar.
Auken blir forklart med auka etterspurnad og bekymringar for lagera no som verda er på veg ut av koronapandemien.
Også amerikansk lettolje har oppgang og blir omsett for 76,12 dollar fatet.
Overfor E24 har Nadia Wiggen, partnar og energianalytikar hos Pareto, peika på 80 dollar som ei psykologisk grense for oljeprisen den siste tida.
I gårsdagens morgonrapport frå DNB Markets skreiv analytikar Oddmund Berg at den oppovergåande utviklinga truleg kan knytast til frykt for energiskvis i Europa.
Oljeprisen har dobla seg fleire gonger sidan prisen nådde sitt siste botnnivå på under 20 dollar fatet i april i fjor.
Banken og meklarhuset Goldman Sachs kom søndag med varsel om at oljeprisen kan nå 90 dollar fatet i år, skriv Reuters. Det vil i så fall vere det høgaste nivået sidan oktober 2014.
(©NPK)
Eit fat nordsjøolje blir omsett for meir enn det har gjort på tre år.
Foto: Carina Johansen / NTB
