Oljeprisen trekte Oslo Børs ned
Det kraftige fallet i oljeprisen bidrog til at hovudindeksen ved Oslo Børs fall med 1,9 prosent tysdag.
Hovudindeksen enda på 726,70 poeng etter at handelen stengde klokka 16.30. Då hadde det vorte omsett aksjar for nesten 6,3 milliardar kroner gjennom dagen.
Samtidig låg prisen på eit fat nordsjøolje rundt 20,70 dollar. Det er rundt 6 dollar lågare enn ved stengetid måndag. Gjennom tysdagen har prisen vore godt under 19 dollar. Ifølgje Dagens Næringsliv er dette det lågaste sidan 1999.
Oljeprisfallet bidrog òg til at Equinor fall med 1,7 prosent gjennom dagen. Selskapet vart igjen dagens mest omsette i verdi, og enda med ein kurs på 128,30 kroner.
John Fredriksens tankreiarlag Frontline vart dagens nest mest omsette og vart òg dagens store vinnar med ein auke på 13,1 prosent i aksjekursen. Også Norwegian steig gjennom tysdagen, og enda opp 5,7 prosent.
Seismikkselskapet Magseis Fairfield vart dagens tapar med eit fall på 18,7 prosent.
Energisektoren fall totalt 2,2 prosent, medan sjømatsektoren gjekk ned 0,7 prosent og shipping opp 3,5 prosent.
Også dei viktigaste europeiske børsane fall gjennom tysdagen. Verst gjekk det for DAX 30 i Frankfurt, som enda ned 3 prosent, men også CAC 40 i Paris og FTSE 100 gjekk ned med høvesvis 2,5 og 1,9 prosent.
På USA-børsane peikar òg pilane nedover. I 17-tida norsk tid er teknologiindeksen Nasdaq ned 3,3 prosent, den breitt samansette S&P 500 er ned 2,8 prosent og industriindeksen Dow Jones er ned 2.3 prosent.
(©NPK)
Oslo Børs fall tysdag. Foto: Lise Åserud / NTB scanpix
