Oslo Børs ned frå start måndag
Hovudindeksen på Oslo Børs fall kraftig ved opning måndag, men henta seg på formiddagen noko inn att. Equinor er ned over 5 prosent.
Etter fire minutt var hovudindeksen på Oslo Børs ned rundt 4 prosent. Alle 25 tungvektarane på børsen fall frå start, og Equinor, DNB og Nel var alle ned over fire prosent.
Noko av grunnen til fallet frå start er at kongressen i USA framleis ikkje har klart å bli samde om ein krisepakke for næringslivet, samtidig som koronaviruset treffer landet med full styrke. Det skaper uro i marknaden.
Sidan har børsen henta seg noko inn att og ligg i 10.40-tida rundt 2,2 prosent ned. Energisektoren dreg ned, og Equinor, som er mest omsett, er ned over 5 prosent.
Norwegian-aksjen stupte frå start og var nesten 19 prosent ned på fire minutt. Han har sidan teke seg opp litt og er rundt 10 prosent ned.
Oljeprisen fall rett etter opningstid på børsen. Klokka 9 kosta eit fat nordsjøolje 26,3 dollar, men prisen fall med nesten ein dollar på ein time.
Oslo Børs avslutta fredag ei turbulent veke med ein liten oppgang etter at Noregs Bank kutta styringsrenta med 0,75 prosentpoeng til 0,25 prosent.
Sidan 20. februar har hovudindeksen falle med nesten 30 prosent, men førre veke henta han seg inn over fire prosent, ifølgje Dagens Næringsliv.
(©NPK)
Oslo Børs fall frå start måndag. Arkivfoto: Lise Åserud / NTB scanpix / NPK
