Oslo Børs auka med nesten 3 prosent
Hovudindeksen på Oslo Børs gjekk opp 2,9 prosent til 755,4 poeng den første handelsdagen etter påske. Men prisen på Norwegian-aksjar vart nesten halvert.
Kursen på det kriseramma flyselskapet fall 44,3 prosent til 4,6 kroner i handelen på tysdag.
Energisektoren fall 1,2 prosent, sjømatsektoren løfta seg 4,9 prosent medan shipping steig 3,9 prosent. Omsetninga tysdag enda på 6,3 milliardar kroner.
Dagens vinnarar blant dei mest omsette selskapa på hovudindeksen er NEL, som aukar 12,4 prosent, og Mowi som stig 5 prosent. Elles går både DNB, Telenor, Orkla og Yara opp over 3 prosent.
Equinor fell 0,9 prosent og Aker BP fell 4,4 prosent etter svak utvikling i oljeprisen. Tysdag ettermiddag blir nordsjøolje omsett for 30,7 dollar fatet, eit fall på vel 3,5 prosent gjennom dagen.
Nikkei-indeksen i Tokyo stengde opp 3,1 prosent tysdag.
I Frankfurt steig DAX-indeksen med 1,8 prosent tysdag. I London svekte FTSE 100-indeksen seg 0,5 prosent, og i Paris gjekk CAC 40-indeksen opp 0,9 prosent.
I USA er Dow Jones opp 1,9 prosent ved 17-tida tysdag. S&P 500-indeksen er opp 2,2 prosent, medan den teknologitunga Nasdaq går opp 3,2 prosent etter børsstart.
(©NPK)
Oppgang på Oslo Børs tysdag. Foto: Lise Åserud / NTB scanpix
