Oslo Børs opna ned etter nedslåande SSB-rapport
Etter at SSB-prognosane for norsk og internasjonal økonomi vart lagde fram, opna hovudindeksen på Oslo Børs med ein nedgang på 1,33 prosent til 740,20 poeng.
I SSB-rapporten som vart lagd fram fredag morgon, står det mellom anna at norsk økonomi er i ein lågkonjunktur som sannsynlegvis vil vare i fleire år framover.
Etter at børsen hadde vore open i ein time, hadde fallet auka ytterlegare til ein nedgang på rundt 1,5 prosent.
Mest omsett i opningstimen var Equinor, som hadde ein nedgang på 2,26 prosent, følgt av Aker BP (–2,54), NEL (–1,13) og Storebrand (–3,48).
Eit fat nordsjøolje vart omkring éin time etter børsopning omsett for 21,50 dollar, som er ein nedgang på 0,32 prosent.
Hovudindeksane på dei viktigaste europeiske børsane opna òg med nedgang fredag formiddag. DAX 30 i Frankfurt gjekk ned 1,69 prosent, CAC 40 i Paris var ned 1,46 prosent, medan FTSE 100 i London var ned 1,29 prosent rundt klokka 10.
(©NPK)
Nedgang på hovudindeksen på Oslo Børs fredag formiddag. Illustrasjonsfoto: Håkon Mosvold Larsen / NTB scanpix / NPK
