Oslo-opposisjonen føler seg utelaten i koronadiskusjonar
Det blir oppvaskmøte i Oslo kommune etter at opposisjonen har reagert på at dei ikkje blir involverte i avgjerdene om koronatiltak i hovudstaden, skriv NRK.
Ifølgje kanalen finn møtet stad klokka 14.30 onsdag. Gruppeleiarane for opposisjonen i bystyret føler dei ikkje får informasjon og ikkje blir involverte i koronaarbeidet.
Bystyret har gitt byrådet fullmakt til å handtere pandemien.
– Den makta har dei på fullmakt frå bystyret. Både til å lage forskriftene og til å innføre tiltaka etter smittevernlova. Det sit sju andre parti i bystyret som har spørsmål vi ikkje får stilt, førespurnader og innspel vi ikkje får komme med. Det er krevjande, seier Raudts gruppeleiar Eivor Evenrud til NRK.
Evenrud har skrive brevet på vegner av opposisjonen, som består av Raudt, Høgre, Venstre, Sp, KrF, Frp og FNB.
(©NPK)
Byrådet og opposisjonen i Oslo kommune møtest til oppvaskmøte. Foto: Håkon Mosvold Larsen / NTB
