Perfekt timing for Jøsendal då skaden vart lækt
Mange vart skuffa då EM-sluttspelet for kvinner i fotball vart utsett eit heilt år. For Anna Jøsendal var det perfekt timing.
21-åringen frå Odda var ei overrasking då Martin Sjögren offentleggjorde EM-troppen. Ho debuterte som innbytar i nest siste oppkøyringskamp mot New Zealand og spelte frå start i generalprøva mot Danmark. Mykje tyder på at ho får speletid også i sluttspelet, men om EM hadde vore avvikla til oppsett tid i fjor sommar ville ho ikkje vore aktuell.
– Eg har hatt ein skade som det tok lang tid å bli kvitt. Det var vanskeleg å finne ut akkurat kva som var gale, og kva som skulle til for å bli betre, men no er det funne ei løysing, og eg har ikkje kjent noko til det sidan januar, seier Rosenborg-spelaren til NTB.
Det var lysken som gav henne problem i lang tid.
– Det var ulike ting som fiksa det. Eg fann ut av ting som gjorde det betre, og så har eg hatt skikkeleg bra belastningsstyring og god hjelp av ulike fysioar.
Overraska
Akkurat ein månad før EM las Sjögren opp namnet hennar då han offentleggjorde troppen.
– Det er eit mål eg har hatt, men det var overraskande også for meg, i og med at eg ikkje var med i den førre landslagstroppen og fordi eg hadde slite med skaden. Det var skikkeleg bra timing då skaden sleppte. For min del var det veldig positivt at EM vart utsett eit år, seier ho.
Ho kjenner seg veldig godt motteken i landslagsgruppa.
– Det er ein skikkeleg fin gjeng, og det er kjempekjekt å kunne vere med her. Eg kjenner meg skikkeleg privilegert, og dette er ein gjeng eg har lyst til å vere ein del av også i framtida. Eg skal jobbe hardt for det, seier ho.
Lettare
At ho fekk ein snau halvtime mot New Zealand (2–0) og vel ein time mot Danmark (2–1) og slapp å komme til EM som potensiell debutant sette ho også pris på.
– Det var utruleg kjekt, ei kjempefin erfaring å ta med seg inn i ein meisterskap. Det gjer det også litt lettare for meg om eg eventuelt får speletid i EM.
Jøsendal blir først og fremst rekna som dekning for Julie Blakstad på venstreback, men har også kvalitetar som kan gjere henne til ein potensiell joker.
(©NPK)
For Anna Jøsendal var det perfekt timing at EM-sluttspelet blei utsett eitt år. Ho rakk å bli kvitt ein lei skade og komme i god nok form til å knipe ein plass i troppen. Foto: Terje Pedersen / NTB
Anna Jøsendal i aksjon under EM-troppens trening i England tysdag. Foto: Terje Pedersen / NTB
