Politiet etterforskar serbisk nettverk for narkosal i Oslo
Fem personar knytte til eit serbisk nettverk er sikta for organisert smugling og sal av narkotika i Noreg. Over 10 millionar kroner i kontantar er beslaglagde.
Politiet meiner gruppa har selt store mengder narkotika i Oslo i lengre tid, ifølgje NRK.
Det var i slutten av august at politiet gjekk til arrestasjon etter å ha spana på dei antekne gjerningspersonane. Ein lastebil vart stoppa på ein bensinstasjon i Råde, og der beslagla politiet 9,4 millionar kroner.
Ifølgje politiet vart kokain oppbevart i ei leilegheit på Bjølsen i Oslo, medan pengar vart oppbevarte i ei leilegheit på Grünerløkka. Ein serbisk statsborgar blir mistenkt for å ha vore ein såkalla depothaldar. Politiet slo til då dei mistenkte at pengar skulle førast ut av Noreg.
Ytterlegare 1 million kroner vart funne i to leilegheiter i Oslo, og 1,2 kilo kokain er beslaglagde i saka. Politiet meiner dei kan bevise at denne narkotikaen kjem frå ein innførsel av 26 kilo kokain i slutten av mars 2021.
Saka blir etterforska ved seksjonen for organisert kriminalitet i Oslo. Dei samarbeider med utanlandsk politi. Etterforskarane meiner serbarane i Oslo har kommunisert med det politiet mistenkjer er ein organisator i Serbia.
– Det er ein god del undersøkingar vi ønskjer å få gjennomført i dei heimlandet til dei sikta, Serbia, men også i andre land, seier politiadvokat Jens Johannes Andenæs til NRK.
(©NPK)
