Rapport: Kritisk mangel på metall til det grøne skiftet
Auka gjenvinning og eigenproduksjon av metall som er viktige for det grøne skiftet, som litium og kobolt, må til for å unngå kritisk mangel, ifølgje rapport.
Dei neste 15 åra kan Europa stå overfor ein kritisk metallmangel dersom ein ikkje lykkast med å sikre ny tilgang på gruver og auka kapasitet til foredling av metall, til dømes smelteverk. Det viser ein rapport frå det belgiske universitetet KU Leuven, utarbeidd på oppdrag frå Eurometaux, ei europeisk bransjeforeining for metallprodusentar.
Men også gjenvinning er ei svært viktig brikke. Dersom gjenvinningskapasiteten blir bygd opp, kan 40–75 prosent av Europas behov for metall til grøne energiløysingar blir dekte gjennom gjenvinning innan 2050.
Mellom anna er det nødvendig med 35 gonger meir litium og 3,5 gonger meir kobolt enn i dag for å nå EUs klimamål innan 2050, ifølgje rapporten.
Aluminium, kobbar, silisium og nikkel er alle materiale det trengst auka årleg tilførsel av samanlikna med i dag. Materiala er nødvendige for elbilar og batteri, sol- og vindkraft, hydrogen og eit moderne kraftnett.
(©NPK)
Litium, kobolt og nikkel er metall som blir brukt i elbilar eller elbilbatteri. Det kan bli kritisk mangel på desse metalla i Europa om det ikkje blir tatt grep. Foto: Gorm Kallestad / NTB / NPK
