Rashford: - Ingen er betre for United enn Solskjær
Manchester United-spissen Marcus Rashford nyt å spele under Ole Gunnar Solskjær og er heilt sikker på at nordmannen er rett mann til å leie klubben vidare.
Det seier Rashford i eit ferskt intervju med Sky Sports føre bortekampen på søndag mot Sheffield United i Premier League.
United har komme seg tilbake på vinnarsporet etter ein tung sesongstart, og Solskjær ser ut til å sitje trygt i managerstolen førebels. Men då Mauricio Pochettino fekk sparken av Tottenham tysdag, blussa rykta om at han kan vere ein aktuell United-manager, opp igjen.
Rashford seier samtidig Solskjær var avgjerande for at han valde å forlenge kontrakten, og at han vil ha kristiansundaren som manager i lang tid.
- Vi er på bølgjelengde og ønsker dei same tinga for klubben. Ole er ein fantastisk fyr, og han har interessene til klubben i hjartet sitt. Så det finst ingen betre person for jobben, meiner eg, seier stjernespissen.
Rashford minner samtidig om at United er i ein slags oppbyggingsfase etter å ha gått halvtanna år utan å vinne noko. Derfor må både Solskjær og andre ha tolmod, meiner han.
- Om vi klarer å vinne nokre trofé og samtidig komme oss inn blant topp fire (i serien), så har sesongen sjølvsagt vore ein suksess. Det handlar om å vise kva vi kan få til i framtida, for vi veit at dette ikkje kjem til å snu tvert. Ole kjem ikkje til å få alt han ønsker over natta.
(©NPK)
Marcus Rashford er full av lovord om manager Ole Gunnar Solskjær. Foto: Ian Walton / AP / NTB scanpix
