Regjeringa får kritikk for å halde Nav-rapport hemmeleg

I forkant av den kommande rettssaka som offer i såkalla Nav-saka har retta mot staten, er det kravd innsyn i rapport frå 2014 der saksbehandlarar slo fast at det var forboden å innføre bustadkrav eller direkte eksportforbod mot å ta med seg trygd ut av landet.

I eit prosesskriv til Oslo tingrett har Regjeringsadvokaten lagt ned forbod mot at rapporten skal lastast opp i aktørportalen, der partane i rettstvistar kan dele dokument, medan domstolen vurderer om han er relevant som bevis i saka, skriv VG.

– Reagerer sterkt

Rune Halseth leier organisasjonen Nav-oppryddinga og er sjølv blant offera som har saksøkt staten ved Arbeids- og velferdsdepartementet. Han reagerer sterkt på saksbehandlinga i forkant av rettssaka i mars neste år.

– Staten meiner altså at det er viktigare å skjerme embetsmenn mot kritikk i sosiale medium, enn å sørgje for at saka blir godt nok klargjord i rettssaka. Det reagerer vi sterkt på, seier Rune Halseth til VG.

Tidlegare i november kom det fram at delar av rapporten er sladda. Den interne trygdeutgreiinga i regjeringa slo fast at Noregs praksis med å nekte folk å ta med seg trygd til utlandet var i strid med EØS-avtalen, men at det fanst rom for unntak.

– Svært skuffa

Også SV er kritiske til hemmeleghaldet.

– Eg er svært skuffa og forundra over avgjerda til regjeringa. Signalet som kom frå eit svært breitt fleirtal på Stortinget er ikkje til å misforstå: Hemmeleghaldet rundt dette dokumentet må ta slutt. Eg vil rose regjeringspartia på Stortinget som var med på å be om at Stortinget får innsyn, derfor trudde eg også verkeleg at regjeringa ville gjere som komiteen bad om, seier SV-leiar Audun Lysbakken i ein e-post til NTB.

Han får støtte frå Seher Aydar, som sit i kontroll- og konstitusjonskomiteen for Raudt.

– Dette ser verre og verre ut for arbeidsminister Marte Mjøs Persen. Ho har fått alle sjansar til å leggje korta på bordet, men tviheld på hemmeleghaldet til Solberg-regjeringa.

(©NPK)