Røde Kors: – Urban krigføring set millionar av liv i fare
Krig går føre seg stadig oftare i urbane område, noko som set millionar av sivile liv i fare, ifølgje Røde Kors. Organisasjonen ber partane skjerpe seg.
Om lag 50 millionar menneske lid under konsekvensane av at krigføring skjer i byar, fastslår Den internasjonale Røde Kors-komiteen (ICRC).
Dette er tilfelle for innbyggjarane i mellom anna Afghanistan, Syria, Libya, Ukraina, Jemen og Gazastripa, ifølgje organisasjonen, som ber krigførande partar gjere vern av sivile til førsteprioritet før alle angrep.
Det finst ikkje noko forbod mot å føre krig i byar, og krigførande partar plasserer ofte ut kanonar, rakettar, granatar, bomber og eksplosiv i urbane område. Folk blir drepne, såra og fordrivne, samtidig som kritisk infrastruktur som sjukehus, kraftanlegg og vassanlegg blir øydelagd.
– Dei sivile tapa som følgje av bombing og granateld er uakseptabelt. Det hastar for statar og alle partar i væpna konflikt å gjennomgå og tilpasse den militære politikken sin og praksis og unngå å bruke eksplosive våpen som har stor rekkjevidd i folkesette område, seier ICRCs president Peter Mauer i ei fråsegn torsdag.
(©NPK)
Ein hjelpearbeid frå Dei kvite hjelmane i Syria sjekkar eit klasserom på ein skule i Aleppo som har vorte øydelagt i granatangrep. Foto: AP / NTB
