Ruud vidare i Wien etter slitekamp – møter Sinner i kvartfinalen

Italienske Sonego sa før kampen at han ville prøve å hjelpe landsmann Jannik Sinner i kampen mot Ruud på ATP-rankinga, der dei åtte beste kvalifiserer seg for tourfinalen i Torino.

Og det skulle vise seg å bli ein vrien kamp for nordmannen som til tider har herja på ATP-touren. Sonego sette Ruud på fleire prøver dei to første setta, men Ruud vakna etter kvart og viste kvifor han har vunne heile fem titlar i år.

No er han altså vidare i kampen om den sjette triumfen sin. Ruud braut Sonegos siste servegame i det første settet og vann det. Sonego braut Ruud i sett nummer to og skapte spenning.

I det tredje settet var det òg lenge jamt, og til slutt vart det avgjort då Ruud braut Sonego på stillinga 5–4 og sikra sigeren etter to timar og 42 minutt.

I kvartfinalen ventar nemnde Sinner. Han er 7.-seeda i turneringa og vil ikkje vere ein enkel motstandar i kampen for poenga inn mot tourfinalen. Sinne slo austerrikske Dennis Novak 6-4, 6–2.

God motstand

Ruud gav Sonego fleire moglegheiter i løpet av dei første servegama sine og enda opp med å bli broten i det tredje servegamet sitt. Det verka som nordmannen fekk seg eit lite dytt etter servebrotet. I dette gamet følgde han opp med å bryte Sonegos serve etter kjempespel.

Sonego viste at han ikkje ville vere noka nikkedokke i oppgjeret mot favoritten, men Ruud braut òg Sonegos siste servegame og sikra seg settet med 7–5.

I sett nummer to verka det som om nordmannen hadde komme litt meir til seg sjølv. Han tvinga Sonego til verkeleg å kjempe for å vinne servegama sine, medan han noko enkelt sikra inn sine eigne. Det var heilt til Sonego braut nordmannen på stillinga 4–4 og serva inn settsigeren.

Det tredje settet var lenge jamt før Ruud fekk ei moglegheit til å bryte på stillinga 4–3 til nordmannen. Sonego henta seg likevel inn og forlengde kampen. Men på stillinga 5–4 måtte italienaren gi tapt. Ruud hamra ein forehand langs sida som sette Sonego ut av spel.

Mot Torino

Turneringane som står att for tenniseliten før tourfinalen i midten av november er ein ATP Masters-turnering i Paris og ei ATP250-turnering i Stockholm. Ruud skal delta i begge turneringane, og vil vere avhengig av å vise krefter om han skal sikre ein plass blant dei åtte finalistane.

Hubert Hurkacz (2955), Sinner (2905), Cameron Norrie (2875) og Felix Auger-Aliassime (2420) er alle innanfor skothald på Ruud (3060) på rankinga.

Auger-Aliassime slo torsdag ut Norrie, medan Hurkacz rauk ut for Andy Murray i første runde i Wien.

(©NPK)

Casper Ruud er vidare i ATP-turneringa i Wien etter siger mot Lorenzo Sonego. Her under Indian Wells for to veker sidan. Foto: Mark J. Terrill / AP / NTB