Samla uttale frå nordisk idrett – seier nei til russisk deltaking

Norges idrettsforbund har denne veka vore vertskap for det nordiske idrettsleiarmøtet.

Det omfattar alle olympiske og paralympiske komitear og idrettsforbund i heile Norden.

I ei pressemelding heiter det at situasjonen med den eskalerande, russiske aggresjonen i Ukraina var det viktigaste temaet på møtet.

Møtet i Noreg meiner at den auka militære aggresjonen forsterkar behovet for klar tale frå idrettsorganisasjonane når det gjeld framleis utestenging av Russland og Belarus i internasjonal idrett.

Dette vart synleggjort i ei fellesfråsegn sendt til dei internasjonale idrettsorganisasjonane. Denne uttalen støttar opp under det tidlegare vedtaket i idrettsstyret i saka.

Mottakarar av uttalen som vart send fredag, var Den internasjonale olympiske komiteen (IOC), Den europeiske olympiske komité (EOC), Den internasjonale paralympiske komiteen (IPC), Den europeiske paralympiske komité (EOC) og ANOC (Forbundet av nasjonale olympiske komitear).

I uttalen heiter det mellom anna at dei finn Russlands invasjon til å vere eit openbert brot på internasjonal lov. Dei skriv at Russlands aggresjon eskalerer. Under desse omstenda finn det nordiske idrettsleiarmøtet det uakseptabelt å opne for russisk og belarusisk deltaking i internasjonal idrett igjen.

– Vi står fast på standpunkta våre. Dette er ikkje det rette tidspunktet til å vurdere deira retur, heiter det i uttalen.

Det nordiske møtet ber den olympiske- og paralympiske rørsla og alle dei andre idrettsorganisasjonane om å vise solidaritet med det ukrainske folket og kravet om fred. Dei ber om full støtte for at ingen utøvarar og tenestemenn frå Russland og Belarus får delta i internasjonal idrett.

(©NPK)

Norges idrettsforbund og idrettspresident Berit Kjøll har vore vertskap for det norske idrettsmøtet denne veka. Foto: Geir Olsen / NTB.