Shanklys barnebarn vil ha statuen av Liverpool-legenda fjerna

Det uttaler Chris Carline (39) til lokalavisa Liverpool Echo. Bestefaren hans Bill Shankly er tidenes mest suksessrike Liverpool-manager og ein evig helt i klubben.
– Eg veit at bestefaren min blir sitert meir enn nokon gong no, og det er heilt riktig, for det som skjer no, kunne ikkje vore lengre unna det han ønskte for denne klubben, seier Carline, som til dagleg er direktør i Shankly Hotel og også driv velgjerdsstiftinga i Shanklys namn.
– Eg er forferda og flau. Når du snakkar om Liverpool FC og klubbens historie og røter, kunne du vist til sju, åtte, ni av sitata til bestefar som alle passar til denne situasjonen. Men eg tenkjer spesielt på ein kommentar om at han ønskte å føre fotballklubben nærare fansen, og fansen nærare fotballklubben. Og det oppnådde han, seier Carline.
Ein statue av Shankly som triumferande strekk armane i vêret har fått heidersplassen føre Liverpools stadion Anfield. Der blir han kanskje ikkje ståande dersom klubben gjer alvor av superligaplanane dei er del av saman med elleve andre europeiske storklubbar.
Shankly tok over som Liverpool-manager i 1959 og skapte stor suksess med klubben heilt fram til han gav seg i 1974. Han døydde i 1981.
– Det er ikkje ei overdriving å seie at han ville ha snudd seg i grava over dette. Om eg får sjansen, vil eg gjerne få statuen fjerna, seier Carline.
Under namnet til Shankly på statuen står orda «He made the people happy». Barnebarnet seier at det gjer vondt at klubben bevegar seg i motsett retning av det som var ønsket til managerlegenda.
– Det som svir mest er at Liverpool har ei historie og tradisjon, som han skapte, for å gjere ting på riktig måte. Å vere ein av seks klubbar som pressar på for dette, er heilt uakseptabelt.
EMBED START Image Statuen av managerlegenda Bill Shankly utanfor Anfield. Foto: Jon Super / AP / NTB EMBED END Image(©NPK)