SJAKK-VM: Ny remis etter perfekt Carlsen-forsvar
Fabiano Caruana opna friskt i det femte partiet i sjakk-VM, men tittelhaldar Magnus Carlsen forsvarte seg framifrå og styrte til remis. Dermed står det 2,5-2,5.
Carlsen spelte svært sterkt med svarte brikker torsdag og vart hylla av ekspertar både på NRK og i sosiale medium. Caruana opna offensivt, men lykkast aldri i å knekke den regjerande verdsmeisteren.
Etter at Carlsen hadde hindra åtaksforsøket til amerikanaren skaffa nordmannen seg eit lite overtak i ein periode, men det vart aldri stort nok til å dra i land ein siger.
I dei to neste VM-partia, som blir spelt fredag og søndag, har Carlsen fordelen av å spele med kvite brikker.
VM blir spelt over tolv parti. Dermed vil førstemann til 6,5 poeng kunne kalle seg verdsmeister i langsjakk, men førebels er det dødt løp i London.
(©NPK)
Det er dødt løp mellom Magnus Carlsen og Fabiano Caruana etter fem VM-parti.
Foto: Terje Bendiksby / NTB scanpix
