- Skotveksling mellom soldatar og mistenkte angriparar på Sri Lanka
Soldatar på Sri Lanka har hamna i ei skotveksling med personar mistenkt for innblanding i terrorangrepet 1. påskedag, ifølgje ein militær talsmann.
Skotvekslinga braut ut ved det som blir rekna for å vere ein bombefabrikk aust på Sri Lanka, melder Sky News fredag ettermiddag.
Lokale medium rapporterer at bombevestar skal ha vorte produserte på staden.
Den antatte bombefabrikken ligg i byen Ampaa Sainthamaruthu nær Batticaloa, og skotvekslinga skal ha brote ut i samband med ei ransaking av staden.
Ifølgje ein militær talsmann rykte soldatane ut etter melding om ein eksplosjon, og då dei kom til staden, vart dei skotne på.
Nyheitsbyrået DPA melder at ransakinga førte til at det vart funne sprengstoff og sjølvmordsvestar. Det er ikkje meldt om drepne eller såra.
Over 250 menneske vart drepne i terrorangrepet på Sri Lanka 1. påskedag.
Tre fulle kyrkjer og tre luksushotell vart ramma av sjølvmordsbomber. Ei av kyrkjene låg i Batticaloa.
(©NPK)
St. Anthony-kyrkja i Colombo var blant dei seks måla for terrorangrepet sist søndag. Fredag vart det meldt om skyting ved det som reknast for å vere ein bombefabrikk i byen Batticaloa på austkysten av Sri Lanka. Foto: Manish Swarup / AP / NTB scanpix
