Sleit ut OL-gullvinnaren: – Kan hende det var litt i overkant

Det seier Ingebrigtsen til NTB under eit medietreff om den nye boka til trenarpappaen, «Gjerts metode».

I boka listar den suksessfulle trenaren opp oppskrifta for korleis hans «gutar» har vorte nokre av dei beste løparane i verda. Og der kjem ordet «superkompensasjon» inn.

–Gjer du superkompensasjonen på rett måte, så betyr det at du køyrer deg relativt langt ned. Og så tek du det med ro ei stund, før du får ein kraftig «boost» ved at kroppen på ein måte hentar seg inn igjen, seier han.

Ingebrigtsen seier at metoden er svært krevjande, og at det fort kan gi utøvarar som prøver seg på det, reaksjonar. Han nemner mellom anna tida rundt Diamond League-stemnet i Firenze tidlegare i år. Då sprang sonen Jakob Ingebrigtsen inn til ny europeisk rekord på 5000 meter på tida 12.48,45.

– I grenseland

– Vi var akkurat i grenseland etter Jakobs 5000 meter i Firenze. Der var vi nok i grenseland til kva han toler, seier Ingebrigtsen.

Like etter stemnet fekk supertalentet ein halsbetennelse som tvinga han til å droppe Bislett Games på heimebane.

– Det er godt mogleg at det var derfor han fekk halsbetennelsen når vi skulle reise til Bislett, seier pappa Ingebrigtsen og held fram:

– Vi veit enno ikkje kor han henta den betennelsen frå. Det kan godt hende det var litt i overkant. Det gjekk bra, men det var stor risiko, konstaterer han.

Individuell tilnærming

På spørsmål om det er noko dei bruker ofte eller om dei kjem til å halde fram med det, er trenaren tvilande i svaret.

– Tja. Vi kjem til å vere veldig forsiktige, og det kan godt hende at det blir ei meir individuell tilnærming enn kollektivt.

– Vi har gjort nokre kollektive tilnærmingar i superkompensasjon tidlegare, og det har slått veldig uheldig ut for enkelte. Det er litt risikofylt å halde på med, konstaterer Ingebrigtsen.

Det grunngir han med at ein kan halde på med superkompensasjon så lenge utøvarane er unge og friske. På den fronten er det OL-gullvinnar Jakob (21) som akkurat no har dei største moglegheitene.

– Ein kan halde på med det medan utøvarane er relativt unge, for at dei då hentar seg inn og har meir kontroll på restitusjonsbiten. Men jo eldre utøvaren blir, jo vanskelegare blir det å hente seg inn, avsluttar han.

(©NPK)

Gjert Ingebrigtsen seier at dei skal vere varsame med bruken av superkompensasjon framover.
Foto: Fredrik Hagen / NTB

Jakob Ingebrigtsen mista Bislett Games i juni med halsbetennelse. Pappa Gjert trur det kan ha vore for at han var nedkøyrd.
Foto: Stian Lysberg Solum / NTB