«Sløseriombudsmannen» nominert til Fritt Ord-prisen
Are Søberg, kjent for Facebook-sida «Sløseriombudsmannen», er nominert til Fritt Ord-prisen av kulturpolitisk talsperson i Frp, Himanshu Gulati.
Gulati meiner at Søberg har bidrege til ein viktig og kontroversiell debatt om offentleg pengebruk, spesielt knytt til kulturbransjen.
– I staden for å hylle ein person som har teke opp kampen mot offentleg sløsing gjennom å avsløre hårreisande enkeltdøme, vel fleire kunstnarorganisasjonar å kneble han. Det er ei skam overfor alle dei kunstnarane som sjølv har måtta kjempe for retten sin til å ytre seg opp gjennom tidene, seier Gulati.
«Sløseriombudsmannen» Søberg har fått mykje omtale etter at Ytringsfrihetskommisjonen inviterte han til eit innspelsmøte for kunstnarar.
Invitasjonen gjorde at kommisjonsmedlem Begard Reza valde å trekkje seg. I tillegg var forbundet Norske Dansekunstnere kritisk og skreiv eit innspelsbrev med bekymring om arbeidet til kommisjonen til Ytringsfrihetskommisjonen og Kulturdepartementet
– Debatten i den siste tida om Ytringsfrihetskommisjonen har vist eit skremmande bilete av at den gruppa som tradisjonelt har hegna høgast om ytringsfridommen, nemleg kunstnarar og kulturpersonar, kastar han under bussen når eigen maktbase og eigne støtteordningar blir trua, seier Gulati.
I år gjekk prisen til forfattarane Jan Grue, Bjørn Hatterud og Olaug Nilssen.
(©NPK)
Himanshu Gulati (Frp) står bak nominasjonen av «Sløseriombudsmannen» til Fritt Ord-prisen.
Foto: Terje Bendiksby / NTB / NPK
