Sølv til Bjøntegaard og bronse til Strømsheim på normaldistansen i EM
Erlend Bjøntegaard gjekk inn til sølv på normaldistansen i skiskyttar-EM. Endre Strømsheim tok bronse, medan latviske Andrejs Rastorgujevs sikra seg gullet.
Dei nest beste norske mannlege skiskyttarane har slått godt ifrå seg i IBU-cupen, men i EM i Polen stiller òg nokre sterke løparar frå verdscupen, blant dei Erlend Bjøntegaard og latviaren Rastorgujevs.
Kongsberg-løparen vart vraka til VM-laget, men fekk sjansen i EM. Bjøntegaard bomma to gonger på første ståande, så vart det ikkje fleire bom. Rastorgujevs bomma berre ein gong, på første liggjande. Han enda til slutt 1.27 minutt framfor nordmannen.
Endre Strømsheim starta bra med feilfri skyting fram til siste liggjande. Der fekk han ein bom, og det same gjentok seg på ståande. Dermed enda han 1.41 bak vinnaren og på tredjeplassen.
Sivert Guttorm Bakken gjekk inn til femteplass med to tilleggsminutt. Filip Fjeld Andersen var feilfri fram til siste ståande, men måtte tole tre tilleggsminutt og fall ned til 13.-plass.
Håvard Bogetveit enda på 22.-plass, Aleksander Fjeld Andersen nummer 42.
Tidlegare onsdag vart Emilie Kalkenberg beste norske på normaldistansen til kvinnene med 18.-plass.
(©NPK)
Erlend Bjøntegaard tok sølvet på normaldistansen i EM i Polen onsdag. Foto: Berit Roald / NTB
