Spansk slitesiger i EM: Avgjorde mot slutten og slo Russland 26–25

Spania heldt fram sigersrekkja i handball-EM med 26–25 over Russland. Spanjolane måtte jobbe hardt for poenga og låg under med fire mål etter pause.

Russarane misbrukte eit straffekast i siste sekund av kampen. Ballen trefte innsida av stolpen. Russland gjorde fleire nesten uforståelege feil det siste kvarteret av oppgjeret, og det kosta dei sigeren.

Spania kan nesten 100 prosent sikkert skaffe seg plass i semifinalen om dei slår Noreg tysdag.

Russland var godt med i første omgang og låg under berre 11–12 ved pause. Russarane leidde både 18–15, 19–16, 20–17 og 22–18 i andreomgangen. Spania utlikna til 23–23 etter vel 49 minutt og spelte taktisk klokt mot slutten.

Målvakt Gonzalo Pérez de Vargas leverte strålande på tampen av kampen.

Dei spanske tittelforsvararane er oppe i seks poeng på tre kampar, mot to til russarane.

Spania har ikkje tapt ein EM-kamp sidan 23. januar 2018. Då vart det nederlag mot Slovenia på veg mot spansk gull.

Seinare fredag skal Polen møte Sverige (18.00), medan Noreg møter Tyskland (20.30).

(©NPK)

Spania-trenar Jordi Ribera under handball-EM. Foto: Annika Byrde / NTB

ANNONSE
Annonse
ANNONSE
Annonse