Stam fekk fyken av MLS-klubb
Den tidlegare forsvarsstjerna Jaap Stam (49) er ferdig som hovudtrenar i MLS-klubben FC Cincinnati.
Det skjer etter ei rekkje skuffande resultat. FC Cincinnati har tapt seks av dei sju siste kampane og ligg nest sist i MLS' austre avdeling.
Stam tok over jobben som trenar i Ohio-klubben i mai i fjor. Han blir erstatta mellombels av U19-trenaren til klubben, Tyrone Marshall, opplyser MLS.
– Undervegs i prosessen med å finne ein ny sportsdirektør, vart det tydeleg at eit byte av hovudtrenar òg var nødvendig. Derfor har klubben teke avgjerda om å gå vidare utan Jaap som hovudtrenar, uttaler klubbpresident Jeff Berding.
Stam hadde ein stor karriere som speler i mellom anna PSV Eindhoven, Manchester United og Lazio. Etter at han la opp har han trena Reading, Zwolle, Feyenoord og FC Cincinnati.
Norske Jonas Stensrud Fjeldberg vart nyleg drafta til FC Cincinnati, men han spelar på utlån i Rio Grande Valley FC i USL-ligaen.
(©NPK)
Jaap Stam må på jobbjakt etter å ha fått sparken i FC Cincinnati. Foto: Jeff Dean / AP / NTB
