Statkraft-resultatet i første halvår det beste i historia til selskapet

Statkraft hadde eit underliggande driftsresultat på 2,6 milliardar kroner i andre kvartal, ein oppgang på 1,2 milliardar frå same periode i fjor. Auken kom først og fremst av eit forbetra resultat frå Marknadsoperasjonar og høgare kraftproduksjon, opplyser selskapet i ei pressemelding.

Den gjennomsnittlege systemprisen var i april til juni 35,6 euro per megawattime, ned med 9 prosent frå andre kvartal 2018. Statkrafts totale kraftproduksjon enda på 12,3 terawatt, ein auke på 0,9 prosent.

Resultat etter skatt enda på 2,1 milliardar kroner, ein auke på 1,9 milliardar kroner frå i fjor.

Også for første halvår er resultatet sterkt, med eit underliggande driftsresultat på 9 milliardar kroner. Det er ei betring på 1,7 milliardar kroner samanlikna med same periode i 2018.

- Driftsresultatet for første halvår er det beste i historia til selskapet og gjenspeglar god drift og vellykka marknadsaktivitetar, seier konsernsjef Christian Rynning-Tønnesen.

Dei siste åra har selskapet inngått nye, og reforhandla eksisterande kontraktar i Noreg og utlandet. Avtalen med spanske Audax Renovables skal ifølgje Statkraft gjere selskapet til ein konkurransedyktig leverandør av fornybar energi, og i juni vart det vedtatt at dei skal bygge vasskraftverket Los Lagos i Chile. Det vil styrke selskapet i den chilenske marknaden, og blir forventa å vere ferdigstilt i andre kvartal 2022.

(©NPK)

Konsernsjef Christian Rynning-Tønnesen under presentasjonen av Statkrafts resultat for andre kvartal og første halvår. Foto: Berit Roald / NTB scanpix