Uefa gir seg ikkje i superligasaka – vil fjerne spansk dommar

Det europeiske fotballforbundet (Uefa) såg ut til å strekkje armane i vêret måndag kveld, men tysdag melde forbundet at det vil fjerne dommaren Manuel Ruiz de Lara frå saka. Det er dommaren som gjorde at Uefa valde å droppe sanksjonane mot klubbane i superligaprosjektet.

I ei pressemelding hevdar forbundet at det har vore «betydelege avvik» i prosessen.

I tillegg ankar Uefa dei tidlegare avgjerdene gjort i den spanske domstolen.

I ei pressemelding frå Uefa seint måndag kveld kom det fram at den juridiske prosessen som vart sett i gang, og deretter sett på pause i juni, vart annullert.

Real Madrid, Barcelona og Juventus var dei tre klubbane som er att i superligaprosjektet. I mai vart det oppretta etterforsking av dei tre klubbane.

Ingen bøter

I tillegg melde Uefa at dei ni andre klubbane ikkje treng å betale bøter. Dei ni klubbane var òg ein del av superligaplanane, men trekte seg raskt då prosjektet fekk enorm kritikk verda over. Uefa og klubbane vart samde om ei bot på 15 millionar euro, men desse pengane vil førebels ikkje bli kravd inn.

Det skjedde etter at ein domstol i Madrid tidlegare i år avgjorde at Uefa ikkje kan sanksjonere klubbane. Saka vart deretter send til EU-domstolen som skal ta stilling til om Uefa skal rette seg etter dommen. Sist veke avgjorde domstolen i Madrid at Uefa hadde fem dagar på seg til å følgje førre dom fordi klubbane må vernast til saka er ferdigbehandla.

I Uefas pressemelding måndag heitte det at avgjerda deira var for å unngå «unødvendige komplikasjonar» med den aktuelle saka i Madrid.

Sinne og kritikk

Tolv klubbar offentleggjorde natt til måndag 19. april planar om å danne si eiga turnering. Kontraktane var signerte, men under to døgn seinare havarerte prosjektet.

Sinne blant fansen og beinhard kritikk frå politikarar og medium, særleg i England, bidrog til kollapsen.

Manchester City var først ute med å stadfeste at dei ville hoppe av. Raskt følgde Manchester United, Liverpool, Arsenal, Chelsea og Tottenham etter. Seinare gjorde spanske Atlético Madrid og Milano-klubbane Inter og Milan det same.

– Forpliktande avtale

Real Madrid, Barcelona og Juventus uttrykte på si side at dei ikkje hadde gitt opp planane om ein framtidig superliga.

Real Madrid-president Florentino Pérez uttalte dette i sommar:

– Det er ein forpliktande avtale, og superligaen fortset. Dei (Uefa og Fifa) truar oss for verne den dominerande posisjonen sin, og dei engelske laga fall under den tvangen, sa Perez i eit intervju med den spanske sportsavisa Marca.

(©NPK)

Real Madrid får inntil vidare ingen straff frå Uefa for superligaprosjektet. Foto: Manu Fernandez / AP / NTB