Sverige vil ikkje bruke AstraZeneca på personar under 65 år
Folkhälsomyndigheten i Sverige vidarefører rådet om at AstraZeneca-vaksinen ikkje skal givast til personar under 65 år.
Personar under 65 som allereie har fått éin dose av AstraZeneca, bør tilbydast andre dose av den såkalla mRNA-typen, som Pfizer eller Moderna, seier Folkhälsomyndigheten.
Statsepidemiolog Anders Tegnell, som nettopp har runda 65, fekk måndag den første dosen sin med AstraZeneca.
Tegnell sa tysdag at AstraZeneca har ein høg verneeffekt og sterkt reduserer faren for alvorleg sjukdom og død, spesielt blant eldre og svake.
– Dei innrapporterte tilfella av alvorlege biverknader er sjeldne og gjeld mest personar under 60 år, seier Tegnell.
Tysdag vart det meldt om ytterlegare 37 dødsfall knytte til koronaviruset. Til saman har pandemien kosta 13.825 personar livet i Sverige. Totalt er det registrert 916.830 smitta.
Rundt 1,9 millionar har fått første dose med vaksine, vel 23 prosent av befolkninga. I underkant av 690.000 har fått dose nummer to.
(©NPK)
