Tiltak etter terrorangrep ved moské blir forlengd ut året
Politidirektoratet har vedtatt at fleire av dei nasjonale tiltaka etter terrorangrepet ved al-Noor-moskeen i Bærum blir forlengd ut året, men ikkje væpninga.
Avgjerda bygger på Politiets tryggingstenestes (PST) vurdering av trusselen frå høgreekstreme, opplyser Politidirektoratet fredag ettermiddag.
Døme på tiltak er auka nærvær, dialog, informasjonsinnhenting og informasjonsdeling mellom politidistrikta, og dessutan samarbeid mellom politiet og PST.
Politidirektoratet forlenger ikkje føringa om at innsatspersonell som jobbar i tilknyting til større arrangement og folkesamlingar skal vere væpna.
- Norsk politi er generelt uvæpna, og basert på trusselvurderingar frå PST meiner vi det ikkje er formålstenleg med nasjonal ordre om væpning no. Politimeistrane har myndigheit til å vedta væpning av enkeltoppdrag, seier beredskapsdirektør Knut Smedsrud i Politidirektoratet.
(©NPK)
PST meiner trusselen frå høgreekstreme er så alvorleg at nasjonale tiltak som blei sett i verk etter skytinga i denne moskeen i Bærum, blir forlengd ut året. Foto: Terje Pedersen / NTB scanpix
