Fem drepne i påkøyring i tysk gågate
Fem menneske – blant dei ein ni veker gammal baby – vart drepne og mange skadde då ein bil køyrde inn i ei gågate i tyske Trier. Bilføraren er arrestert.
Det er førebels ikkje kjent kva som er motivet for handlinga, men det er ikkje teikn til at det var politisk motivert.
Det var i 14-tida tysdag ettermiddag at ein bil rasa gjennom den bilfrie delen av sentrum i byen Trier.
I alt fem personar vart drepne og ytterlegare 14 vart såra i påkøyringa. Fleire har alvorlege skadar. Vitne til hendinga har fortalt nyheitsbyrået DPA at dei såg folka bli kasta opp i lufta.
Ukjent motiv
Føraren av bilen, ein 51 år gammal tysk mann frå området, vart arrestert på staden, ifølgje politiet. Han var den einaste i bilen.
Påtalemakta har til nyheitsbyrået AFP uttalt at den arresterte kan ha psykiske problem, og dessutan at han var påverka av alkohol.
– Eg kan ikkje forstå korleis nokon kan få for seg å køyre ein SUV gjennom byen og drepe folk, sa ordførar Wolfram Leibe på ein pressekonferanse tysdag kveld.
Spedbarn drepe
Politiet opplyste første at ein ni månader gammal baby vart drepen i hendinga, men publiserte seinare ei pressemelding der det blir opplyst at spedbarnet var ein ni veker gammal jente.
Mor til spedbarnet får behandling på sjukehus, medan den 45 år gamle faren er blant dei døde. Deira 18 månader gamle son får òg behandling på sjukehus.
I tillegg vart ei 73 år gammal kvinne, ei kvinne på 52 år og ei kvinne på 25 år drepne i påkjørselsen.
Delstatspolitiet i Rheinland-Pfalz har bede folk la vere å spreie spekulasjonar om kva som er hende og rette seg etter stadfesta opplysningar frå politiet.
Regjeringa: – Sjokkerande
– Det som har skjedd i Trier, er sjokkerande. Tankane våre går til dei pårørande, dei mange skadde og alle dei som jobbar med å ta hand om dei ramma, seier Steffen Seibert, talsmann for regjeringa i Berlin.
Trier har rundt 110.000 innbyggjarar og ligg rundt 20 mil vest for Frankfurt, nær grensa til Luxembourg.
Meir enn hundre personar samla seg tysdag kveld ved katedralen i Trier for å be for offera og familiane deira.
(©NPK)
Politi og redningstenester i Trier, der fem menneske vart drepne då ein bil raste gjennom ei gågate. Bilføraren er arrestert. Foto: Harald Tittel / DPA / AP / NTB
Store delar av Trier sentrum vart sperra av etter hendinga som kosta fem menneske livet. Foto: DPA / AP / NTB
Brannmannskap på plass i gågata der mange menneske vart påkøyrde tysdag ettermiddag: Foto: Harald Tittel / DPA / AP / NTB
Det er pynta til jul i gågata. Tysdag kveld var politi og brannfolk framleis på staden. Foto: Harald Tittel / DPA / AP / NTB
Folk har tent lys til minne om offera og dei skadde etter påkøyrsla i Trier i Tyskland tysdag. Foto: Oliver Dietze / DPA via AP / AP
