Nordre

ANNONSE
Annonse

To eksplosjonar i bustadblokker i Stockholm – 50 evakuerte

Ein person er skadd og rundt 50 er evakuerte etter to eksplosjonar i to bustadblokker i Husby og Kista nordvest for Stockholm.

Svensk politi undersøkjer no om eksplosjonen har nokon samanheng med sprengladninga som gjekk av utanfor ei bustadblokk i Östermalm i Stockholm for ei dryg veke sidan. Ingen vart skadde, men eksplosjonen førte til store materielle skadar. Ingen er førebels arresterte i saka.

Eksplosjonane i Husby og Kista skjedde med få minutts mellomrom ved 2.30-tida natt til tysdag. Bygningane ligg om lag 500 meter frå kvarandre, ifølgje Aftonbladet.

Dør bles inn

– Døra mi berre flaug inn fleire meter. Den var heilt øydelagt, seier ein av bebuarane til TT. Han bur i fjerde etasje.

– Det var der det small. Alle dører der er blåst inn, legg han til.

To bustadblokker har fått omfattande skadar, men berre den eine er evakuert. Ein person er send til sjukehus med lettare skadar.

Grunnen til evakueringa er dei store skadane og at det er mange lause leidningar, opplyser Fredrik Dackland frå redningstenesta i Stockholm.

Ukjent motiv

Politiet avhøyrde tysdag fleire augnevitne og sende òg eit bombeteam til staden. Motivet er førebels ukjent, og ingen er arresterte.

Ein fotograf frå nyheitsbyrået TT meiner at begge eksplosjonane skjedde i fjerde etasje i kvar av bygningane.

– Balkongen er heilt utblåst, og det ser ut som det har eksplodert på svalgangen i fjerde etasje. Det er massevis av glas overalt, og fleire ruter har blåst ut i bakgarden, seier Fredrik Sandberg.

Politiet har sperra av området, medan teknikarar undersøkjer staden.

(©NPK)

Teknikarar frå politiet undersøkjer ein svalgang i ei bustadblokk i Husby i Stockholm etter eksplosjonane natt til tysdag. Foto: Fredrik Sandberg/TT / NTB scanpix

ANNONSE
Annonse
ANNONSE
Annonse