To forfattarar trekker seg frå litteraturpriskomiteen i Sverige
To forfattarar trekker seg frå Nobelkomiteen i Svenska Akademien. Ein av dei, Kristoffer Leandoer, seier endringsprosessane i organisasjonen går for treigt.
Meldinga om at Leandoer trekker seg, kom måndag formiddag. Like etter kom beskjeden om også Gun-Britt Sundström forlèt komiteen.
Dei to er blant fem eksterne sakkunnige som vart medlemmer av komiteen i slutten av 2018.
– Eg har verken tolmod eller tid til å vente på resultatet av dei endringsprosessane som er sette i gang, skriv Leandoer i eit innlegg i Svenska Dagbladet.
– Akademien og eg har for ulik tidsoppfatning. Eitt år er altfor lang tid i livet mitt, og altfor kort tid i Akademiens, held han fram.
Dei siste to åra har det storma rundt Svenska Akademien, som utpeikar litteraturprisvinnaren på oppdrag frå Nobelstiftelsen.
På grunn av uro og skandalar i Akademien dei siste åra etter avsløringa om at ektefellen til tidlegare medlem Katarina Frostenson, kulturprofilen Jean-Claude Arnault, hadde gjort seg skuldig i seksuelle overgrep, vart prisen ikkje delt ut i 2018.
(©NPK)
