Tønseth deltar i EM i terrengløp
Langrennsløparen Didrik Tønseth reiser til Portugal for å delta i terreng-EM kommande helg.
Det stadfestar langrennsløparen på sosiale medium måndag morgon.
«Da tar æ en liten pause fra langrenn de neste dagan. Valget falt på Lisboa istedet for Lillehammer», skriv langrennsløparen.
Tønseths avgjerd vart tatt etter samtalar med trenar Eirik Myhr Nossum søndag kveld.
28-åringen kom inn til 4.-plass på dei 15 kilometrane på laurdag klassisk i minitouren i Ruka.
– Eg er tredje beste nordmann her i dag, og det skal halde for å få gå Tour de Ski. Då blir det Portugal-tur. Eg vil dit, eg, sa Tønseth til pressa etter løpet på laurdag.
Måndag var det avgjort. Fredag reiser Tønseth til Portugal.
Der kan han få følgje av Filip Ingebrigtsen i seniorklassen og Jakob Ingebrigtsen i U20-klassen. Norges Friidrettsforbund opplyste førre veke at ei endeleg avgjerd på om brørne deltar, vil bli tatt i byrjinga av denne veka.
– Det blir å snappe opp nokre tips. Det blir vel eit lynkurs i springing, sa Tønseth til pressa om å lade opp med Team Ingebrigtsen
Han trur årets EM-løype passar han godt.
– Det skal vere ei ganske tøff løype. Det ser ut som det er ei bra stigning på kurva.
Tønseth tok sølvet under terrengløps-NM i Frognerparken bak Henrik Ingebrigtsen i oktober.
(©NPK)
Didrik Tønseth reiser til Portugal for å delta i EM i terrengløp. Foto: Terje Pedersen / NTB scanpix
