Tre tonn kokain funne drivande i Stillehavet
Politiet i New Zealand gjorde nyleg det største narkotikabeslaget i landet nokosinne då pakkar med til saman tre tonn kokain vart funne flytande i Stillehavet.
Politiet meiner pakkane hadde vorte sleppt frå eit fly før dei var meint å bli plukka opp av nokre andre. Det rakk likevel ikkje å skje før politiet fann dei.
Det er snakk om over tre tonn kokain til ein marknadsverdi på svimlande 3,2 milliardar kroner. Narkotikaen var truleg meint for den australske marknaden.
– Vi trur det var nok kokain til å forsyne den australske marknaden i omtrent eitt år. Og dette ville vore meir enn det New Zealand kunne brukt på over 30 år, seier politimeister Andrew Coster i New Zealand-politiet.
Narkotikaen vart dokumentert og deretter destruert.
Det internasjonale samarbeidet med å avdekkje slike narkotika-leveransar er styrkt, ifølgje Costner. Ingen er til no arresterte, og saka blir etterforska vidare på tvers av landa.
(©NPK)
Over 3 tonn kokain låg godt pakka inn og flaut rundt i ein lite trafikkert del av Stillehavet. Politiet fekk likevel fatt i narkotikaen før den vart plukka opp av andre. Foto: Politiet i New Zealand
Beslaget er det største som nokosinne er gjort i New Zealand. Stoffet hadde ein marknadsverdi på svimlande 3,2 milliardar kroner. Foto: Politiet i New Zealand
