USA har testa mellomdistanserakett
USA har testa ein landbasert mellomdistanserakett. Raketten trefte målet 500 kilometer unna, opplyser forsvarsdepartementet i Washington.
- Testraketten vart skoten ut frå den mobile bakkebaserte rampen og ramma på nøyaktig vis målet sitt etter over 500 kilometer gjennom lufta, heiter det i fråsegna frå Pentagon måndag.
Testen vart gjennomført etter at USA, og deretter Russland, varsla at dei trekker seg frå INF-avtalen. Avtalen vart lagt død då USAs uttrekking tredde i kraft 2. august.
Intermediate-Range Nuclear Forces Treaty (INF) var ein nedrustningsavtale mellom USA og Russland, dåverande Sovjetunionen, frå 1987. Den forbaud landbaserte mellomdistanserakettar og utskytingsrampar. Forbodet gjaldt både rakettar med atomstridshovud og dei som er utstyrt med konvensjonelle sprengladningar.
USA varsla tidlegare i år testing av to typar rakettar som ville vore forbode i samsvar med INF-avtalen. Russland har varsla utvikling av to rakettyper.
Russland og USA har gjensidig skulda kvarandre for å bryte INF-avtalen. USA og Nato meiner Russland har utvikla eit rakettsystem med lengre rekkevidde enn tillate. Russland har avvist påstandane og hevda at det er USA som har brote avtalen ved å utvikle dronar med eigenskapar som liknar på mellomdistanserakettar.
USA har òg vore misnøgd med at INF-avtalen berre har lagt avgrensingar på USA og Russland, og ikkje på Kina. Det er eit argument òg Russland har vist til. Nato har tatt til orde for ein ny versjon av INF som omfattar fleire land.
(©NPK)
