Ving tar over tolv hotell i Spania
Vinggruppen kjøper det spanske hotellselskapet AROE, som eig tolv hotell på Mallorca, Menorca og Kanariøyane.
Dei tolv hotella har til saman 2.194 rom og 1.700 tilsette. Ifølgje ei pressemelding omfattar kjøpet fem av hotella som er mest populære blant kundane til Vinggruppen.
- Vi er glade for at vi no har sikra nokon av dei best likte hotella våre òg for framtida, og at vi gjennom oppkjøpet òg skaper nye moglegheiter for å vekse med nye hotell i middelhavsområdet og på Kanariøyane, seier konsernsjef Magnus Wikner i Vinggruppen i Norden.
Etter konkursen for reisegiganten Thomas Cook kjøpte Petter Stordalens selskap Strawberry saman med to oppkjøpsfond opp Vinggruppen. Dette omfattar 2.300 tilsette i Ving, Spies, Tjäreborg og Thomas Cook Airlines Scandinavia.
(©NPK)
Petter Stordalen saman med blant andre Ving-maskotane Lollo og Bernie, då det vart kjent at han er blant dei nye eigarane av Ving. Foto: Janerik Henriksson / TT / NTB scanpix
