Woodward: - Solskjær kan gi Manchester United eit løft
Manchester Uniteds klubbdirektør Ed Woodward trur Ole Gunnar Solskjær vil samle spelarar og supporterar før andre halvdel av sesongen.
Onsdag vart det klart at Solskjær tek over som mellombels manager i United. Han skal leie klubben ut sesongen saman med Mike Phelan.
- Ole er ei klubblegende med stor erfaring, både som speler og i trenarroller. Historia hans i Manchester United betyr at han lever og andar kulturen her, og alle i klubben er begeistra over å ha han og Mike Phelan tilbake, seier klubbdirektør Ed Woodward i ei pressemelding.
Woodward har måtta tole mykje kritikk dei siste åra, mellom anna for tilsettingane av David Moyes, Louis van Gaal og José Mourinho. Han trur Solskjær vil løfte stemninga i United-garderoben etter ein blytung start på sesongen.
- Vi er trygge på at det nye trenarteamet vil samle spelarane og supporterane inn i den andre halvdelen av sesongen, seier han.
Laurdag ventar Solskjærs første test i den nye jobben sin. Då reiser han til Wales for å møte gamleklubben Cardiff.
Tysdag vart det klart at Mourinho var ferdig som Manchester United-manager. Han sikra tre trofé i klubben.
(©NPK)
Ole Gunnar Solskjær tar over Manchester United ut sesongen. Foto: Svein Ove Ekornesvåg / NTB scanpix
