Zabaleta gir seg i England etter sesongen
Pablo Zabaleta stadfestar at han no tar fatt på sin siste sesong i Premier League. West Ham-forsvararen ser ikkje bort frå at det blir karrierepunktum i mai.
34-åringen har signert ein eittårsavtale med West Ham, men slår fast at det blir den siste kontrakten i England.
- Det blir definitivt den siste sesongen min i England, det veit eg, sa Zabaleta på ein pressekonferanse tysdag, ifølgje nyheitsbyrået AFP.
Argentinaren meiner det er for tidleg å snakke om at karrieren kan vere over etter sesongen, men ser ikkje bort frå at han kan legge opp.
- Eg veit ærleg talt ikkje. Eg veit at eg er 34 år, byrjar å bli litt gammal og nærmar meg karriereslutt. Eg er ærleg med meg sjølv, sa Zabaleta.
Høgrebacken er mest kjent frå tida i Manchester City. Der spelte han frå 2008 til 2017 før han signerte for West Ham. Han har så langt notert 293 kampar, åtte mål og 22 målgivande pasningar i den engelske toppdivisjonen.
(©NPK)